Ásmundur kallast þessi dýrlingur í skrám kaþólsku kirkjunnar á Íslandi en endranær Osmund, Osmond eða Osmer. Hann er sagður greifasonur frá Sées í Norðmandí. Hann fylgdi móðurbróður sínum, Vilhjálmi bastarði (d. 1087), til Englands 1066 og gegndi í fyrstu embætti konunglegs kapelláns en varð 1072 kanzlari, sá þá um bréfritun konungs og ýmsa stjórnsýslu. Hann finnst kallaður jarl af Dorset. Hann varð 1078 biskup í Salisbury í suðurhluta landsins, og lét þó ekki að fullu af störfum sínum fyrir konung. Ásmundur lét reisa dómkirkju í Old Sarum (Sarisburia), stofnaði við hana dómklerkaráð og setti því skipulagsskrá, sem síðar varð fyrirmynd í öðrum biskupsdœmum. Hann þótti duglegur stjórnandi, lærður vel, hreinlífur, hófsmaður í öllu og bókavinur mikill, afritaði sjálfur og batt inn bœkur. Hann kann einnig að hafa samið helgisiði góða, sem eftirmaður hans lagði þó gjörva hönd á. Ásmundur lét taka upp helgan dóm Aldhelms biskups (d. 709). Þegar samin var jarðabók yfir England, Dómsdagsbókin, var Ásmundur biskup kvaddur að því verki, sem lauk árið 1086. Dauðadagur hans og messudagur er 4. desember, en 16. júlí er minnzt upptöku á beinum hans árið 1226. Rannsókn var árið 1228 leyfð á verðleikum og jarteinum hans, og 1456 tók Calixtus III. hann í tölu helgra manna. Englendingar höfðu varið löngu erfiði og miklum kostnaði til að fá það mál fram. Ásmundur er sagður góður til áheita við tannpínu, beinbrotum, lömun og sturlun.
Farmer, Hugh @ Santi, beati e testimoni
Jones, Terry @ Star Quest Production Network
Odden, Per Einar @ Den Katolske Kirke i Norge
Parker, Anselm @ The Catholic Encyclopedia (1911)
Stadlers Vollständiges Heiligenlexikon
Wikipedia (enska)
Wikipedia (franska)
Wikipedia (þýzka)
Helgisetur 