Júlíana fœddist í Retinnes í Belgíu 1193 eða skömmu fyrr. Hún var fimm ára, þegar foreldrar hennar dóu. Þá var hún send í klaustur Ágústínusarreglunnar á Cornillonfelli, skammt frá borginni Liège og í námunda við átthaga stúlkunnar. Ekki var ætlunin að setja hana til mennta, en hún lét það ekki aftra sér frá að sniglast í bókasafni klaustursins og rýna í handrit, unz hún hafði lært lestur, skrift og latínu. Uppáhaldshöfundar hennar voru heilagur Ágústínus og heilagur Bernard. Þetta mæltist vel fyrir, og árið 1207 var hún tekin í klaustrið sem ungnunna. Hún þótti sérstaklega guðrækin, lá löngum stundum á bœn frammi fyrir guðslíkamahúsinu og fékk leyfi til að fasta hvern dag fram að kvöldverði. Júlíana fékk árið 1209 vitrun: Hún sá fullt tungl, en á það vantaði dálítið stykki. Síðan birtist Kristur henni og skýrði út, að tunglið táknaði kirkjuárið, en í það vantaði hátíð til minningar um líkama Drottins. Hann birtist henni oftar, en hún sagði engum frá vitrunum sínum fyrr en 1230, eftir að hún hafði verið kjörin príorinna. Þá byrjaði hún að tala fyrir hinni nýju hátíð, sem vantaði í kirkjuárið, og ræddi það meðal annars við ýmsa guðfrœðinga. Þar á meðal var Jaques Pantaléon erkidjákni í Liège, sem síðar átti eftir að verða páfi undir nafninu Urbanus IV. Þeim leikmönnum, sem þóttust eiga að hafa hönd í bagga með klaustrinu á Mont-Cornillon, geðjaðist misjafnlega að fjárstjórn Júlíönu, og hún var um skeið rekin þaðan. Robert de Thorete biskup í Liège lét 1246 rannsaka málið. Príorinnan var hreinsuð af öllum ásökunum og kölluð heim, auk þess sem biskupinn innleiddi í stifti sínu guðslíkamahátíðina Corpus Christi. Hann dó 1248, og þá var Júlíana aftur flæmd burt. Hún dvaldi síðasta áratug ævi sinnar í einveru í klaustrum Cisterciareglunnar í Belgíu. Jacques Pantaléon varð páfi 1261 og hafði ekki gleymt samtali sínu við príorinnuna sálugu. Hann ákvað 1264 að innleiða hátíðina Corpus Christi í allri kirkjunni og fékk Tómas frá Aquino til að semja helgisiði, sem þótti takast hið bezta. Júlíana var 1869 tekin í tölu blessaðra, og messudagur hennar er 5. apríl.
Hátíðin Corpus Christi, sem á íslenzku nefnist dýridagur, er haldin fimmtudaginn næsta eftir trinitatis (eða sunnudaginn á eftir, hvort sem biskupum þykir betur henta). Þá eru víða farnar helgigöngur, og hér má sjá stutta mynd frá hátíðarhöldunum í Róm síðasta fimmtudag.
Wikipedia (franska)
Wikipedia (þýzka)
Wikipedia (enska)
Wikipedia (hollenzka)
Francis Mershman (The Catholic Encyclopedia)
Per Einar Odden (kaþólska kirkjan í Noregi)
Domenico Agasso (Santi e beati)
Santopedia
Katherine Rabenstein (St. Patrick Catholic Church)
l´Eglise Catholique en France
Star Quest Production Network
HeiligenNet
Ökumenisches Heiligenlexikon
Heiligen-3s
Thomas Mollen (Bistum Münster)
Robert McNamara (Irondequoit Catholic Communities)
Encyclopædia Britannica
Barbara Newman (Monastic Matrix)
Spirituality for Today
Catholicism (Slaves of the Immacculate Heart of Mary)
George Ambrose Bradbury (Google bækur)
Catholic Match
Los Angeles Lay Catholic Mission
Unborn Word of the Day
Roger Landry (Catholic Preaching)
Society of St. Pius X in Canada
